Det tok berre 14 minutt for Jerv å ta leiinga mot nedrykkstruga Nest-Sotra heime på Levermyr.
Henrik Robstad scora sitt tredje mål for sesongen då han sende gultrøyene i leiinga. Jerv hadde fleire sjansar til å auke leiinga, men gjekk til pause eitt mål føre gjestene frå Hordaland.
Ligg på kvalik
I andre omgang heldt heimelaget oppe trøkket. Kvarteret ut i omgangen fekk laget løn for strevet då Alexander Lind scora sitt ellevte mål for sesongen.
12 minutt før slutt fastsette Dennis Antwi sluttresultatet til 3-0.
Dermed ligg Jerv framleis på kvalifiseringsplass med tre serierunder att.
Tett i toppen
Men det blir truleg kamp heilt inn om dei fire kvalifiseringsplassane. Hødd ligg berre to poeng bak Jerv med ein kamp mindre spelt.
Samstundes har Jerv berre eitt poeng opp til Sandnes Ulf som ligg på 4. plass.
Nest-Sotra er eitt steg nærare 2. divisjon etter søndagens tap i Grimstad.