– Eg skal gje alt, men innimellom er det ganske tøft, seier ho til NRK.
Vi får snakke med ho i ein pause på fem minutt. I løpet av desse minutta har ho moglegheit til å gå på do og få i seg mat.
– Eg er litt skjelven og redd for at eg ikkje skal klare det, men eg skal halde fram, seier Irslinger.
Mål: 60 timar bak orgelet
Måndag fyller ho 60 år. Difor er målet å spele orgel samanhengande i 60 timar og hamne i Guiness rekordbok.
Dei første tonane i Trefoldighetskirken i Arendal kom laurdag morgon klokka ni.
Målet er å halde det gåande til klokka 22 måndag kveld. 59-åringen har lov til å ta fem minutt pause kvar time. I natt hadde ho spart opp 35 minutt, som gjorde at ho fekk litt søvn.
– Det er heilt fantastisk. Det er ei stor oppleving med så mykje flott musikk. Nina gjer ein fantastisk innsats, seier sokneprest i Arendal Åsta Ledaal.
Ho har fått med seg det meste til no. Under gudstenesta i kyrkja søndag føremiddag kunne dei frammøtte nyte orgelmusikk.
– Vi har aldri hatt musikk under preika tidlegare. Det var utruleg spennande, seier ho.
Sette rekord i 2009
Med seg på laget har Irslinger songarar og kor frå heile Sørlandet. Det er ikkje berre salmar som fyller kyrkja. Alt frå pop, rock og folkeviser.
– Det er heilt utruleg flott. Det er slik eg vil at det skal vere. Det skal vere høgt under taket i kyrkja. Det er plass til alle menneske og alle kunstartar, seier Ledaal.
Irslinger hamna i Guiness rekordbok i 2009 då ho spelte samanhengande i 36 timar. Den rekorden er no slått og målet er altså å ta den tilbake.
– Eg håpar den vert ståande veldig lenge, men ein veit aldri, seier ho.