Torsdag lanserte båtprodusenten to nye modellar på båtmessa «Båter i sjøen» på Aker Brygge i Oslo.
Dei to modellane skal byggast i Froland.
– Eg er full av begeistring. Dette er morosamt å sjå. Det er morosamt at dei kjem med eit slikt løft, seier eigar av båtprodusenten Marex i Grimstad, Espen Aalrud til NRK.
- Les også: Spent på lansering av nye Ibiza-modeller
Går mot straumen
– Eg tykkjer båten var fin og spenstig. At dei torer å satse såpass i Norge, slik som marknaden har vore, er drittøft, seier teknisk sjef i Viknes Båt og Service, Jan Inge Sivertsen.
Mange av norske båtprodusentane har flagga ut av landet. Årsaka er at det er dyrt å produsere båtane her, samanlikna med i utlandet.
Mange har flytta produksjonen til Polen, Litauen, Sverige og fleire andre land.
– Det er ein naturleg reaksjon på kostnadsnivået vi har i Norge, seier administrerande direktør i bransjeorganisasjonen Norboat, Erlend Prytz.
– Eg tykkjer det er veldig gøy at nokon klarer å halde seg fast i Norge, seier han.
– Fantastisk mottaking
Ibiza Boats har allereie selt 100 av dei nye båtane. Berre 15 minutt etter at messa opna på Aker Brygge fekk båtprodusenten truleg napp.
– Eg likar heile konseptet med enklare løysingar og ein breiare båt. Eg reknar med at eg kjem til å kjøpe, seier Jan Christensen, som er på båtjakt.
Designar i Ibiza Boats Helge Duus tykkjer det er moro med skryt frå konkurrerande båtprodusentar.
– Mottakinga har vore fantastisk både av kollegaer og forhandlarar. Så langt er alt vel, smiler Duus.
Båtmessa i Oslo held fram til og med søndag.