I dag opna Noreg det første forskingssenteret for batteri i Grimstad

– For å vere heilt ærleg er det ein draum å vere med på denne batterireisa i Noreg, seier 27 år gamle Ina Ruud Winther.

Ho er utdanna ingeniør og ein av rundt 80 tilsette ved forskingsstasjonen til fabrikken i Grimstad, som vart offisielt opna fredag.

Senteret ligg ved sida av Universitetet i Agder (UiA), og vil vere kompetansesenteret der Morrow Batteries kan utvikle ny batteriteknologi.

– Det at vi har fått eit forskingssenter er heilt fantastisk, seier Ruud Winther.

Betyr mykje for landsdelen

Både politikarar og næringstoppar var til stades under opninga av forskingssenteret.

For første gong opna dei dørene til laboratoriet der forskarar og studentar skal samarbeide om å utvikle batteriteknologien.

– No er vi inne i ein labb som retta blikket framover som kan sjå kva vi treng for å nå det grøne skriftet, seier fylkesordførar Arne Thomassen (H).

Han meiner dette er noko av det største som har skjedd i Agder på over 100 år.

Også ordføraren i Grimstad, Beate Skretting, var med på opninga.

– Dette har veldig stor betydning for byen vår. Eg er glad for at det ligg i Grimstad, ikkje berre for næringslivet men også for universitetet.

Håpar på tettare samarbeid med staten

Same dag som forskingssenteret opna dørene er det nøyaktig tre år sidan Morrow vart grunnlagd i 2020.

– Dette er ei stor bedrift som har komme lang på kort tid, meiner styreleiar i Morrow, Liv Monica Stubholt.

Men det å starte ein batterifabrikk og eige forskingssenter kostar pengar.

Per no har Morrow fått inn 2,5 milliardar kroner av dei totalt 30 som dei treng.

Stubholt seier dei heile tida jobbane med å sørgje for finansiering av prosjektet.

– Eg er ikkje bekymra. Marknaden er i vekst og det vil vere stor etterspurnad av batteri. Det kan vi produsere i Arendal og dokumentere i Grimstad.

Ho understrekar likevel at ein ikkje skal ta noko for gitt.

– I sum krev finansieringa tett samarbeid mellom offentleg og privat sektor.

Næringsminister Jan Christian Vestre (Ap) sa til NRK for eit par veker sidan at norske selskap ikkje kan forvente seg like gode subsidieordningar som til dømes amerikanske selskap har fått i USA.

– Regjeringa jobbar med å sjå på korleis vi skal oppgradere verkemidla våre og eg håpar at vi har nærare avklaringar fram mot sommaren, seier Vestre.

Forskarar frå heile verda samla

Målet med forskingsstasjonen er at Morrow sjølv skal utvikle ny, smartare og billigare batteriteknologi som dei kan bruke på det som skal bli deira eigen fabrikk i Arendal.

Og forskingssjef ved Morrow Batteries, Jon Fold von Bülow, har eit klart mål:

– Den dagen vi kan seie vi har klart det er når vi har utvikla ein batteriteknologi som er grønare, blir laga av andre materiale enn i dag og som kan plassere i eit produkt.

Forskingssjefen beskriv batteriutviklinga som eit internasjonalt kappløp, men trur stasjonen i Grimstad har ein fordel.

– Vi har trekt til oss forskarar frå heile verda. 25 ulike nasjonalitetar jobbar no hos oss.