– Eg har veldig respekt for Marinko Kurtovic som trenar. Eg tykkjer han har gjort mykje bra i klubbane han har vore, seier Sondre Paulsen til NRK.
Kurtovic vart presentert som ny ØIF-trenar i pausen i gårsdagens oppgjer mot Haslum i Sør Amfi. Han er i dag trenar i Runar Sandefjord og tek over ØIF Arendal først etter denne sesongen.
Ventar knalltøffe treningar
– Han står for ein type handball som eg likar veldig godt. Han krev mykje av spelarane og han får resultat. Eg trur dette blir bra, seier Paulsen.
Kurtovic har mellom anna seriegull og cupfinale på CV-en frå då han var trenar i Drammen. I Runar har han semifinale i europacupen Challenge cup å vise til. Som Stavanger-trenar tok han sølv i serien. Han har også eliteseriebronse med Vestli.
– Eg likar han veldig godt. Han er kjend for knalltøffe treningar med mykje springing. Han er veldig flink i klubbane han har vore og er tydelegvis flink til å få det beste ut av alle. Det gler eg meg til å sjå, seier Eirik Heia Pedersen.
– Eit kanonval
Asle Gran tok over som hovudtrenar i klubben etter at Leif Gautestad fekk sparken i desember. Også han er særs positiv til den nye trenaren.
– Det er eit kanonval. Han har gjort mykje bra i klubbane han har vore. Han kan veldig mykje handball, er ein fin person, flink med spelarar, flink til å utvikle spelarar og lag, seier Gran.
– Han er tøff med respekt, kyndig og veldig handballdyktig, så han blir veldig bra å få inn, seier han.
Sportsleg leiar Per Carsten Michelsen er glad for at spelarar og trenar Asle Gran er positiv til Marinko Kurtovic.
– Spelarane veit det vert tøft
– Vi fekk berre positive tilbakemeldingar frå spelarane då dei fekk vite det. Samstundes er dei klar over at det blir harde bod på trening. Det blir mykje trening utan ball, mykje styrke og anna trening. Dei veit kva han står for og veit at det vert tøft framover, seier han.
Ifølgje Michelsen sprenger ikkje klubben bankkontoen når dei hentar Kurtovic.
– Det er ei avtale som ligg omtrent på nivå med den vi hadde med Leif Gautestad. Den er litt annleis utforma, men kronemessig per månad for klubben er omtrent det same, seier Michelsen.