– Ho viser at ho er på topp i Europa, men ho er også blant toppane i verda, seier Nordby til NRK.
Dahlen tapte finalen mot sin franske motstandar måndag kveld, men sikra likevel si beste plassering nokonsinne då ho sikra sølv.
– Betyr mykje
– Dette betyr mykje for norsk bordtennis. Aida har vist i mange samanhengar at ho er ein fantastisk ambassadør for idretten vår, seier han.
Kristiansandaren tapte finalen 0-3, men er strålande nøgd med sølv.
– Det var veldig gøy. Sist tok eg bronse og no kom eg til finalen. Eg hadde sjølvsagt håpa på å vinne, men eg var ikkje god nok. Så det var veldig gøy med sølv, seier Dahlen.
Dei sterke prestasjonane gjer at ho no er utteken til EM for funksjonsfriske som startar i Wien seinare denne veka.
– Vi har ikkje dei store forventningane til dei norske deltakarane her. Men vi har eit ungt lag som håpar å klatre høgare enn tidlegare, seier han.
Hovudmålet for Dahlen er OL i Rio om tre år. Generalsekretæren har trua på at ho kan klatre til topps på tabellen etterkvart.
Satsar mot Rio
– Teknisk sett er ho blant dei beste. Ho er framleis ung og har ambisjonar. Ho er ei flott idrettsjente som trenar mykje. Ho satsar mot Rio i 2016 og har ambisjonar om å gjere det bra, seier han.
– Eg har tru på at ho kan ta gull etterkvart. Ho har vist fleire gonger at ho er i toppen. Det er berre snakk om tid, så er ho heilt i toppen, seier Nordby.
Hovudpersonen sjølv har trua på at ho vil ta gull i framtida.
– Eg vil stå på toppen ein gang. Eg må berre jobbe hardt framover. Det er VM neste år, EM året etter, så kjem Rio. Det er berre å jobbe hardt og gjere det bra i Rio, seier ho.