Det har klubben avgjort onsdag ettermiddag.
– For klubben har det vore viktig å vere tydeleg på at dette er ein uakseptabel oppførsel, seier administrerande direktør i Start, Sveinung Hovstad i ei pressemelding.
– Hulsker har sjølv lagt alle kort på bordet og vist ein oppriktig vilje til å rydde opp, skriv han.
Hulsker: - Vil sjå framover
Til VG nett seier Hulsker sjølv at han no ynskjer å sjå framover.
- Eg har ikkje lyst til å seie så mykje om det som har skjedd. No ynskjer eg å konsentrere meg om det som skjer framover, seier Hulsker til vg.no.
- No skal eg trene for fullt med laget, og få med meg slutten av sesongen. Det gleder eg meg veldig til. Eg har noko å sjå fram til, meiner spissen.
33-åringen vil ikkje gje seg med fotballen etter sesongen.
- Eg har veldig, veldig lyst til å spele fotball neste år, men ein kan aldri føle seg trygg på nokon ting. Det er viktig for meg å fullføre sesongen på ein ok måte, seier Hulsker.
Beklaga valdsepisoden
Det var natt til søndag at Hulsker slo ned ei dørvakt i Kristiansand, og hamna i fyllearresten. Hulsker vedtok eit førelegg på 10 000 kroner.
LES OGSÅ: Hulsker bøtelagt for vold
Valdsepisoden fekk stor mediemerksemd, og Hulsker var raskt ute med å beklage hendinga.
«Eg beklagar sterkt det som skjedde seint laurdag kveld. Slikt skal ikkje førekomme og det fins ingen unnskulding for det eg har gjort», skreiv han i ei pressemelding.
Får ikkje ny kontrakt
– Vi gjer han tre kampars karantene. Kontrakta hans går ut etter denne sesongen. Den vil ikkje bli forlenga, skriv Hovstad.
Hulsker skal trene for fullt med Start ut kontraktstida.
– Klubben er innstilt på å leggje til rette for Hulsker si framtid som fotballspelar, skriv Hovstad.
