– Heilt uavhengig av styrevedtaket står det fast at ein skal føle tryggleik for at det ikkje skjer vesentlege endringar, seier Høie til NRK.
Statsråden var tysdag i møte med styreleiaren og administrerande direktør i Sørlandet sykehus. Han møtte også tillitsvalde ved sjukehuset og politikarar.
Plass til tre sjukehus
Møtet vart halde berre dagar etter at styret vedtok at det skal vere tre sjukehus i landsdelen også i framtida, med hovudsjukehus i Kristiansand.
– Før ein gjer eit vedtak på sjukehusplan 2030 skal vi ha vedteke helse- og nasjonal sjukehusplan. Då må dei halde seg til det som ligg der, seier helseministeren.
Høie meiner at det vil vere plass til tre sjukehus i landsedelen også i framtida.
– Det oppfattar eg at der er veldig lite ueinigheit kring. Eg ser ikkje at det skjer noko med at ein ikkje skal ha tre sjukehus, seier han.
- Les også: – Uklokt at sykehusvedtaket kom nå
Styreleiar: – Han var tydleg
Styreleiar Camilla Dunsæd sa dette etter møtet med helseministeren.
– Han var tydleg på at vi ikkje skal gjere endringar i sjukehusstruktur, funksjonsfordeling eller innhald i sjukehusa våre før nasjonal helse- og sjukehusplan kjem, seier ho.
– Det er eigentleg det same som styret sa i punkt tre i sitt vedtak. Vi skal ta utviklingsplan 2030 til behandling når den planen er klar, seier Dunsæd.
Den nasjonale helse- og sjukehusplanen blir lagt fram til hausten og vil ikkje vere ferdig behandla lokalt på Sørlandet før om eitt år.
- Les også: Godskesen på krigsstien