– Helsetilsynet i Oslo og Akershus meiner at involvert anestesipersonell gjorde ei feilvurdering, og såleis ikkje lukkast å oppnå ønskt effekt av anestesien. Vi meiner dette er eit klart brot på god praksis, konkluderer tilsynet, ifølgje Dagbladet.
– Kappa meg opp
Det var i april i fjor at 41-åringen ikkje fekk nok bedøvelse under ein våken hjerneoperasjon. Trebarnsfaren fekk påvist hjernesvulst i 2005 og blitt operert fire gonger.
Egeland skulle gjennom ein såkalla våken kraniotomi. Under ein slik type operasjon blir pasienten halde våken for å kontrollere at hjernevev ikkje vert skada når svulsten blir fjerna.
– Eg kan jo hugse at dei kappa meg opp. Dei brukte eit sagliknande reiskap. Men det var jo meir ille då dei rota inni hovudet mitt, sa Egeland til NRK.no i fjor.
Mannen gjekk gjennom den same operasjonen to år tidlegare utan problem. Helsetilsynet trekkjer fram at det vart gitt vesentleg mindre bedøvelse under operasjonen i fjor enn under operasjonen i 2008.
Har fått problem
– I saksdokumenta kjem det ikkje fram nokon grunn til at det vart gitt mykje lågare dose i 2010. Det er heller ikkje gitt noko openbar forklaring på dette, herunder heller ikkje frå uttalelsane til anestesioverlege og anestesisjukepleiar, skriv Helsetilsynet.
41-åringen har fått store problem i etterkant av operasjonen, og har fått diagnosen Post traumatisk stressyndrom.
– Eg gjenopplever operasjonen heile tida, sa Egeland.
Ifølgje avisa kom Norsk pasientskadeerstatning tidlegare i år fram til at han ikkje har krav på erstatning.
