Her kan du hoppe i «havet» utan å fryse

Dei siste dagane har det nemleg vore jobba intenst for å få klart eit flytande badebasseng - på sjøen like ved Arendal sentrum.

– Gårsdagen var heilt forferdeleg gjennom sluttføring, oppløft og å setje det på sjøen. No byrjar nervane å roe seg, seier hamnesjef Rune Hvass til NRK.

Han vedgår at han verkeleg har kjent på nervane då dei byrja rigginga.

– No ser vi at vi har kontroll og at dei enorme utrekningane som er gjort faktisk stemmer, seier han.

Difor gjorde dei det

Bassenget skal vere det første i sitt slag og er bygd med støtte frå Innovasjon Norge. Bassenget blir ståande i gjestehamna i Arendal.

Det er ikkje berre varmare vatn som er årsaka til at Hamnestyret valde å vere med på å lage eit slikt basseng.

– Vi ynskte å lage varig verdiskaping på Sørlandet og i denne regionen. Vi vil bidra til å utvikle nye produkt og nytte kompetansen som allereie er her innan kompositt og plastbåtindustri. Det er det vi har kombinert her no. Så har vi laga eit selskap som skal selje desse produkta, seier han.

Det betyr at liknande basseng kan dukke opp også andre stader i landet.

• Les: Hopp i havet på Sørenga

– Supert

– Det er kaldt i Norge sjølve på sommaren. Her kan vi få eit basseng som er oppvarma, som ligg og flyt, og som du kan bruke heile året, seier han.

Bassenget blir godt teke imot blant folk i gjestehamna.

– Eg vart så glad då eg såg i går at det var på veg inn i hamna. Det er supert med ein badeplass midt i byen. Veldig bra, seier Ingvild Rydland Brekke.

• Les: Dette bassenget kan være en bakteriebombe