– Når eg byrja å forstå ting var det litt skummelt. Men når eg vart fem år var det greitt, seier Max til NRK.
– Eg tykte han var litt skummel når eg var liten. Eg var litt redd han. Men det har alltid vore litt sånn wow. Det er veldig mykje pyroeffektar og kule ting, seier Johanne Regine.
Er nervøse
Dei to unge håpefulle skodespelarane er inne i dei siste førebuingane til Kaptein Sabeltann-showet som startar opp førstekommande måndag i Dyreparken.
– Nervane er store. Men det blir stort sett gøy då, seier Max.
Dei har vore, og er gjennom lange dagar med øving for å vere best mogleg budd til premieren måndag.
– Eg trur nesten alle barn har eit forhold til Kaptein Sabeltann. Det er veldig gøy å få vere med på dette, seier Johanne Regine.
Men dei to er langt frå ferskingar. Begge har vore med på Evita og Thorbjørn Egner-førestilling. I tillegg song Regine på opninga av teater- og konserthuset Kilden i Kristiansand.
Vil bli skodespelarar
Sørlendingane er klar på at det er skodespelarar dei vil bli.
– Eg vil satse på skodespel. Det er veldig veldig veldig veldig veldig veldig gøy. Fantastisk, seier Max.
– Eg føler eg lærer veldig mykje av dei andre skodespelarane. Dei er veldig veldig flinke, seier Regine.
