– Det viktigaste er at ein byggjer organisasjon i takt. Mange har forsøkt før, men har ikkje klart å bygge organisasjon på same tid. Viss ein ikkje klarer det blir det kortvarig, seier Larvik-trenar Tor Oddvar Moen til NRK.
– Dei har byrja på noko som er bra her. Eg trur dei kan ta nokon skritt og hevde seg både her og ute i Europa, seier Moen.
Onsdag kveld såg han sitt eige lag høvle over Vipers i Aquarama. Då sluttsignalet gjekk viste resultattavla 32–18 til serieleiaren frå Vestfold.
Revansjerte tap
Dermed revansjerte laget seg etter tapet mot Vipers sist dei var på besøk i Aquarama.
– Det er alltid greitt å komme tilbake og gjere det skikkeleg. Det var veldig god innsats og godt gjennomført av jentene, seier Moen.
Tysdag vart det klart at ein av dei store profilane i norsk handball skal spele for Vipers neste sesong. Linn Jørum Sulland kjem frå ungarske Györ etter denne sesongen.
– Ho vil tilføre Vipers ei meir skytesterk høgreside som kanskje har vore litt sakna. Det kan bli eit godt bidrag, seier Moen om sin tidlegare elev.
Kunne ikkje hente Sulland
Larvik-trenaren seier at dei ikkje var i kontakt med Sulland denne gongen.
– Vi har vore i ein streng økonomisk situasjon som vi ikkje er heilt ute av endå. Vi er ikkje i posisjon til å hente spelarar frå alle stader no, seier han.
På pressekonferansen tysdag sa Sulland at ho vil vere med på å gjere Vipers til ein toppklubb.
– Eg tykkjer det er spennande. Det hadde vore kult å bygge opp eit nytt topplag i Norge slik at ein kunne få litt konkurranse i toppen av serien. Eg trur Vipers har potensial, sa Sulland.
Medan Sulland reiser frå Györ reiser Larvik-spelar Nora Mørk til den ungarske storklubben. Mørk trur Larvik vil dominere i Norge også i åra framover.
– Eg syns dei forsterkar bra, men Larvik har rutinen i botnen. Så handlar det om å gå gjennom ein heil sesong og levere. Då har du ikkje råd til feilskjær. Eg held ein knapp på Larvik, men det er gøy med litt kamp, seier Mørk.