Her er berre jenter velkomne: – Det har fenga heilt sjukt

Jentesatsinga har blitt «hole in one» for Golfforbundet. Tala snakkar for seg sjølv.

Målet var å få med minst 225 jenter mellom 6 og 19 år på eigne treningskveldar for jenter over heile landet. Det vart 900.

Dei såg også føre seg å halde 15 arrangement i løpet av året. Over 40 arrangement er gjennomført over heile landet.

Målet var også å få med minst 16 klubbar landet rundt. Totalt 55 klubbar har halde golfkveldar berre for jenter.

Julie er ei av mange jenter som har kasta seg på golf det siste året.  

– Eg vart med ein gang og så har det vore veldig gøy. Det har fenga heilt sjukt, seier Julie Darre Svendsen.

– Det er veldig gøy med golf, seier Adele (10).

Slik lukkast dei

Klubbar og forbundet gjorde sjølv undersøkingar for å finne ut korleis dei skulle få med fleire jenter.

Årsaka er at golf til no har vore ein idrett med stort fleirtal av gutar og menn.

– Det viste at jenter ville ha mykje sosialt, tid til å prate, litt mat og sjølvsagt golf. Vi ser at miksen av dette gjer at dei tykkjer det er veldig gøy. Då kjem dei igjen gang etter gang, seier Haraldsen.

– Vi har laga eit opplegg som passar for jenter og som er på deira premiss. Det skal vere sosialt og gøy. Det er heilt fantastisk at vi har klart å rekruttere så mange, seier Harald Haraldsen som er ei av eldsjelene i Kristiansand Golfklubb.

Golfklubben opplever at mange jenter kjem tilbake etter å ha vore med ein gang.

Dei er i ferd med å få eit skikkeleg jentemiljø.

– Det er utruleg gøy. At det blir ei god samling av jenter er veldig gøy, seier Julie Darre Svendsen.

Vil vidareføre prosjektet

Jentesatsinga skal halde fram også til neste år. Då er håpet å få med endå fleire jenter.

– Vi håper at prosjektet får leve i mange år i framtida, seier Fredrik Due i Noregs Golfforbund.

Han er stolt over at mange jenter vil bli med på golf.

– Dette har blitt betydeleg betre teke imot av klubbane enn vi hadde turt å håpe på. Det har vore gledeleg, seier han.

Golfboom blant unge