– Det er tungt. Det er tøft å svelge, seier trenar Mattias Andersson.
Laget såg ut til å sikre seg eitt poeng i den første kampen på den nye stadion på Bjønnes.
Men fire minutt på overtid dukka innbyttar Jonathan Lindseth opp og sikra tre poeng for gjestene frå Mjøndalen.
Ein siger på elleve heimekampar
– Dette var ikkje noko gøy. Vi har ein tendens til å sleppe inn mål på slutten. Det er ikkje bra. Vi er ikkje bra nok som lag, seier Arendal-spelar Ylldren Ibrahimaj.
På dei 11 første heimekampane i 1. divisjon har laget kun makta å vinne ein kamp. Ti av kampane har blitt spelt på Myra, medan Norac stadion vart bygd.
Men trenden ser ut til å halde fram også på den nye stadion på Bjønnes.
– Vi har hatt bra statistikk på Bjønnes tidlegare. Men vi må berre jobbe hardt kvar dag og snu denne trenden, seier Ibrahimaj.
– Sigeren kjem
Sesongens 15. tap gjer at det framleis ser mørkt ut med tanke på vidare spel i 1. divisjon. Laget ligg nest sist med fire poeng opp til kvalifiseringsplass.
Arendal kan takke leigesoldaten Marco Priis Jørgensen for at resultattavla ikkje viste større siffer. Keeperen, som er utleigd frå nettopp Mjøndalen, leverte ei rekkje viktige redningar.
Kring 3000 tilskodarar hadde funne vegen til opningskampen på Bjønnes.
– Det var fantastisk. Det var ei veldig fin ramme rundt kampen. Heilt fantastisk. Vi skulle hatt ein siger, men slik vart det ikkje i dag. Det kjem. Det skal eg love, seier Ibrahimaj.