25-åringen frå Risør slo tyske Patrick Linkert i København.
Før kampen la trenar Thorbjørn Gyberg vekt på at Havnaa måtte ta kommandoen frå start. Det var akkurat det 25-åringen gjorde.
Berre to minutt og 40 sekund ut i 4. runde viste Havnaa at han var overlegen. Dommaren stoppa kampen og utropte Havnaa til vinnar.
- Les også: Vil bli verdensmester som sin far
Imponert trenar
– Det var fullstendig overkøyring. Dette er den beste kampen han har gått til no. Han tok styringa frå start som vi snakka om på førehand, seier trenar Gyberg etter kampen.
Dermed har sørlendingen vunne alle sine tre proffkampar etter at han vart med i stallen til Team Sauerland i fjor haust.
– Eg har lagt ned eit utruleg arbeid. Eg er så imponert over Kai Robin. Det er fantastisk bra gjort, seier trenaren.
- Les også: Håper å arrangere proffkamp i Arendal
Blir betre og betre
Gyberg seier det er stort å sjå at eleven lukkast.
– At han har komme så langt som han har gjort allereie er fantastisk, seier han.
– Kor god kan han bli?
– Han kan bli så god han berre vil. Så lenge motivasjonen er der, så vil han gjere det betre og betre for kvar kamp, seier Gyberg.
Dette var truleg Havnaa sin siste kamp før sommaren. Truleg vert det ikkje ny proffkamp før til hausten.