Dersom du blir teken av politiet - med piggdekk - vil du måtte betale 500 kroner i bot for kvart dekk. Den siste veka har vore særs travel for verkstadene i landsdelen. Ved Timenes og Sønn i Vågsbygd i Kristiansand har dekkservicemedarbeidarane hatt det travelt.
– Eg har inntrykk av at fleire og fleire skiftar dekk på verkstad. I forhold til det vi hadde i til dømes februar er dette fantastisk. Då var det stille, seier dekkservicemedarbeider, David Valter til NRK.
– Legg om uansett
Det er lov å køyre med piggfrie vinterdekk også i morgon, men dagleg leiar ved bedrifta, Jens Timenes, rår folk til å leggje om til sommardekk, sjølv om du køyrer piggfritt.
– Piggfrie vinterdekk har eit særdeles og ganske trafikkfarleg grep både på tørr og våt asfalt, når det no i løpet av våren og sommaren vil bli godt og varmt både i bakken og lufta. Gummiblandinga i piggfrie vinterdekk er så dårleg at det i mange tilfelle kan vere skummelt, seier Timenes.
Har mista talet
– Sommardekk og vinterdekk utgjer ein sikkerheitsdetalj som er viktig på bil. Sommardekk eignar seg best på sommaren og vinterdekk eignar seg best på vinteren, seier han.
Dekkservicemedarbeidar, David Valter, er usikker på kor mange dekk han har skifta for dagen den siste veka.
– Ååå, kor mange kan det bli. Det går heilt i...det er alt for mange, smiler han.