– Vi har ikkje nokon tidsfrist, men så raskt som mogleg og gjerne denne veka, seier sportsleg leiar Per Carsten Michelsen til NRK.
Ifølgje Agderposten har trenaren fått permisjon ein dag i veka frå jobben han har på Wang Toppidrettsgymnas.
Det inneber litt mindre pendling frå heimbyen Sandefjord til Arendal.
– Ballen ligg hos ØIF
– Ballen ligg hos ØIF no. Heilheita blir mykje lettare ved at eg kan overnatte meir i Arendal, seier Kurtovic til avisa.
I slutten av januar sa Kurtovic at han sluttar i ØIF etter denne sesongen. Ei av årsakene var mykje pendling mellom dei to byane.
Etter dette har det vore dialog mellom partane. Klubben håpar å få til ei toårsavtale med trenaren, som førte ØIF til cupgull i desember.
Trur på ny kontrakt
– Vi har hatt ein god dialog og ein god prosess heile vegen med han. Det ser ut til at det byrjar å flaske seg. Vi føler vi har god tru på at det går i orden. Det er viktig for mange andre ting som skjer i klubben at dette kjem på plass, seier Michelsen.
Ifølgje Agderposten har toppklubbar i både inn- og utland vore i kontakt med Kurtovic. Dette er ØIF Arendal klar over.
Michelsen stadfestar at klubben ikkje er i kontakt med andre trenarkandidatar.
