Gunnar Pettersen blir trenar i 1. divisjonsklubb

– Her er det moglegheiter. Hadde eg ikkje hatt trua på laget, og spillertypene, så hadde det jo vært heilt uaktuelt, seier Pettersen om overgangen til Kristiansand Topphåndball, der han vert ny hovedtrenar.

To kandidatar

Nestleiar i klubben, Tommy Egeli, seier at fleire agentar og trenarar har teke kontakt med klubben.

– Valet vart gjort på bakgrunn av erfaring og ein trenartype, som vi trur treff veldig godt i spelargruppa, seier han.

Fekk kreft

I 2015 gav Pettersen seg som Vipers-trenar då han fekk kreft.

I tillegg tilfredsstilte han ikkje krav frå Handballforbundet, som seier at ein må ha godkjent trenarkurs for å vere trenar på toppnivå.

– Sjølv om eg har vore landslagstrenar i 15 år, og på toppnivå i nesten 30 år, så krev ein no ein lisens for å vere på dette nivået. Og det er heilt uaktuelt å setje seg på nokon kursbenk i 90 timar for å få lov til å drive med dette vidare, då får det heller vere slutt, sa Pettersen i 2015.

Førte Sandefjord til eliteserien

Den tidlegare landslagstrenaren tek over ein hardtsatsande klubb. Kristiansand Topphåndball hadde som mål å rykke opp til eliteserien denne sesongen, men enda på 7.-plass.

No håpar klubben at Pettersen er mannen som kan ta Kristiansand Håndballklubb opp i eliteserien igjen.

I løpet av tre år er klubbens visjon å vere topp fem i eliteserien. Krs Topphåndball har også hausta erfaringar frå toppklubbane ØIF Arendal, Elverum, Nærbø og Vipers Kristiansand.

– Vi har forsøkt å hente ut det beste frå desse klubbane, seier Egeli.

Etter tida i Vipers har Pettersen jobba som ekspertkommentator. I tillegg har han trent Sandefjord i 1. divisjon, som rykte opp til eliteserien denne sesongen.

Likevel forlèt han Sandefjord-skuta til fordel for Kristiansand Topphåndball.