Gravstøtta til krigshelt vart kasta på dynga

Det var i samband med dugnad på kyrkjegarden i Risør at Torkjel Johansen og Ørnulf Kibsgaard fann gravstøtta. Der låg den saman med fleire andre gravstøtter.

– Det var den første støtta eg løfta på. Då eg såg Sigurd Eskeland sitt namn tenkte eg «der fann vi den», seier Johansen.

– På prestekontoret vart det sagt at den skulle sendast og malast opp, sier Kibsgaard.

Drepen i Tromsø

På gravstøtta står det: «Løytnant i Kompani Linge Sigurd Eskeland. Falt i kamp for sitt land i 1943 ved Tromsø».

Sigurd Eskeland leia ei sabotasjegruppe i Toftefjorden i Tromsø i 1943. Gruppa forsøkte å ta seg i land. Det heile enda med katastrofe. Berre ein i kompaniet kom seg unna i live. Dei andre vart drepne av tyskarane.

– Vi må jo ta vare på minnene og heidre dei som har gitt alt for fridommen. Det er det minste kravet, seier Johansen.

• Les også: – Vaksne menn omfamna kvarandre

Tilbake der den høyrer heime

Sigurd Eskeland frå Gjerstad og Risør utvandra til Argentina og starta ein teplantasje. Då krigen kom til Norge reiste han til London og melde seg til teneste.

– Det var vel bevisstheita kring at Norge var ein ung nasjon. Det var berre 35 år etter unionsoppløysinga med Sverige. Det har vi lett for å gløyme, seier Kibsgaard.

No har gravstøtta komme på plass igjen på kyrkjegarden i Risør.

– Det er rørande å stå her, seier Johansen.

Dei to har lagt ned ein krans med norske fargar.

– Det er historie å ta vare på minnene frå dei som gav alt, seier han.

• Les også: Markerer frigjøringsdagen med slipp av historiske bilder

Alt om 70-årsmarkeringen: