– Det er ei voldsom spenning. Eg gler meg heile året til dette. Når hummarfisket sluttar byrjar eg å tenkje på neste års fiske, seier Karl Åge Høgsås til NRK.
- LES: Bedring for hummeren
Tysdag morgon klokka sju gjer han seg klar og lesser ti teiner oppi båten sin. Klokka åtte opnar hummarfiskesesongen. 78-åringen har fiska hummar i ei årrekkje, men fiskegleda er framleis like stor.
Fekk ni hummar første gang
– Du må vere temmeleg sjuk om du ikkje gler deg til hummarsesongen, ler han.
I 1989 var Høgsås med i ein minidokumentar om hummarfiske på Sørlandet på NRK.
Hummerfiskekarriera til Høgsås starta rett etter krigen. Han hadde fått 20 teiner av far sin som var øydelagde.
– Eg sette dei i stand igjen og rodde ut når det var fint vêr. I det første trekket mitt fekk eg ni hummar, fortel han.
Han hugsar tilbake til gode fiskeår i 1961 og 1962. Då fiska han saman med far sin.
– Det var ein eventyrleg fangst. I løpet av desse sesongane hadde far min mellom 700 og 800 hummar. Til saman fiska far min kring 8000 hummar, seier han.
– Nøgd om eg får ein
No er han klar til å ta fatt på ein ny hummarsesong, men forventningane er langt mindre i år enn i 1962.
– Teinene vi har i dag er jo mykje betre. Tidlegare gjekk dei like fort ut som dei gjekk inn. No er dei veldig gode, seier han.
– Kor mange hummar trur du på første dag?
– Får eg ein er eg nøgd, seier han.