– Eg syns det er eit spennande prosjekt. Eg har tenkt litt over tid om eg skulle tilbake på handballbana dersom prosjektet er riktig. Det syns eg det er, seier Gjekstad til NRK.
Tidlegare denne veka vart det kjent at Kenneth Gabrielsen gjer seg som Vipers-trenar etter sesongen.
Pendling og familiesituasjon gjer at han vil forlate Vipers-skuta.
Gjer comeback
Arvtakaren Gjekstad gav seg som Larvik-trenar i 2015. Sidan den gong har han jobba i næringslivet, og det var ikkje sjølvsagt at han skulle tilbake i handballen.
– Hadde du spurt meg for eit og eit halvt år sidan ville eg svara at eg ikkje kjem tilbake. Men ønsket om å få kampkjensla igjen har meldt seg. Eg trur pausen eg har hatt har vore veldig bra, seier han.
Gjekstad er ein av Norges mest meritterte handballtrenarar med Larvik.
Drøssevis med seriemeisterskap, cupmeisterskap og til og med gull i Champions League står på merittlista.
Tek over serieleiaren
No vil han løfte Vipers opp i europatoppen.
– Eg meiner vi bør ha som mål å vere med heilt i det beste sjiktet i Europa. Per no har ikkje Norge lag blant dei 12 beste, og slik kan vi ikkje ha det. Men eg tenker vi må prøve å sikte oss inn mot topp fire på lengre sikt, seier Gjekstad.
– Kor langt unna er Vipers det akkurat no?
– Ikkje så langt unna denne sesongen. Men det er klart at ein skal jobbe godt for å vere på toppen i Europa over tid, seier han.
Vipers Kristiansand vann cupfinalen i desember og toppar eliteserietabellen. I tillegg skal klubben spele semifinale i EHF-cupen i april.
I Vipers blir han trenar for både Katrine Lunde, Linn Jørum Sulland, Marta Tomac og Emilie Hegh Arntzen.
– Det blir nok nokre nye ansikt neste sesong, men eg har ikkje sett mykje på spelarlogistikken førebels. Det blir nok ikkje store utskiftingar, seier han.