– Eg vil seie at det går mot ei styrt avvikling av den fremste volleyballbygda vi har i landet, seier trenar i Dristug Jetmund Berntsen til NRK.
Eit utval i Aust-Agder fylkeskommune har føreslått å leggje ned den vidaregåande skulen i Åmli. Torsdag kveld markerte kring 700 menneske motstand mot forslaget i eit fakkeltog.
– Forferdeleg trist
Berntsen har sjølv spelt 50 kampar på norske landslag, aldersbestemt og A-landslag. Han har også spelt ei rekkje år i norsk eliteserie. I 1994 flytta han frå Naustdal på Vestlandet til Åmli.
– Eg såg kompetansen dei hadde her. Eg har bidrege som spelar og no har eg lyst til å bidra som trenar. Det er forferdeleg trist å ikkje kunne fullføre det vi er i gang med, seier han.
Juniorlaget til Dristug har teke NM-gull to år på rad på gutesida. Dersom den vidaregåande skulen vert lagt ned vil det aldri skje igjen, trur Berntsen. Det vil også bli vanskeleg å få eit godt A-lag, meiner han.
– Skulen er ein viktig rekrutteringsarena. Viss vi ikkje får behalde skulen vil det bli særs vanskeleg å hente tilbake 25-åringar, som har flytta ut frå bygda som 15-åringar, seier han.
– Toppspelarar vil til Åmli
Det er planar om å byggje ein innandørs sandvolleyballhall i bygda. Ved ei skulenedlegging kan dei truleg sjå langt etter denne.
– Det er klart at fasilitetane er viktige. Ikkje berre for spelarane, men dei vil trekkje anna kompetanse også. Det er attraktivt for trenarar og spelarar, seier Dristug-trenar og trenar på det norske sandvolleyball-landslaget Jostein Olimstad.
Trenaren seier at han kjenner mange volleyballtalent som ynskjer å flytte til Åmli for å satse, dersom hallen blir ein realitet.
– Det vil bli den beste hallen i Norge. Eg veit om fleire som seier dei vil flytte til Åmli den dagen den står på plass, seier han.
– Så toppspelarar i Norge kan komme til å flytte til Åmli?
– Det trur eg absolutt, seier han.