– For oss ser det rett og slett ut som det kjem ein massakre av nedlegging blant flyktningmottaka det neste halve året, seier styreleiar i Link, Morten Jørgensen.
Dei driv ei rekkje asylmottak og har i dag kring 500 tilsette.
Nye prognosar viser at det truleg kjem nær 11 000 asylsøkjarar til Norge i løpet av 2016.
Det er 14 000 lågare enn kva som vart lagt til grunn i samband med revidert nasjonalbudsjett.
– Vil få konsekvensar
– Det er klart vi blir råka. Men vi har ingen grunn til å klage slik sett. Vi jobbar i ein marknad som går opp og ned, seier han.
– Det er alltid synd for dei som vel å satse på ein jobb her og som får så kort og uføreseieleg drift, seier Jørgensen.
Hero Norge, som er den største driftsoperatøren av asylmottak i landet, vedgår at hausten kan by på utfordringar.
– Det er uføreseieleg. Vi held oss til UDI sine vurderingar. Men dersom det ikkje blir noko auke i innkomst vil det få konsekvensar, seier driftsdirektør Vidar Torheim.
– Ting kan snu
Hero Norge har kring 1400 tilsette på asylmottak over heile landet i dag.
– Ting kan snu slik at situasjonen endrar seg. Det er vanskeleg å seie noko sikkert om korleis dei neste månadene blir, seier Torheim.
– Det burde vere mogleg å finne eit system som gjer ting meir føreseieleg, meiner Jørgensen i Link.