– Dette er eit forsøk på svindel via e-post som er kjent, og som dessverre oppstår frå tid til anna, seier kommunikasjonssjef i Nordea Unni Strømstad til NRK.
Kommunikasjonssjef i Nordea Unni Strømstad seier at banken har fått mange telefonar frå kundar som har fått e-posten.
Foto: NordeaMåndag fekk banken ei rekkje telefonar frå både kundar og banktilsette som har fått e-posten.
«Kontoen din er åpen»
– Vi har fått eit titals telefonar frå Sørlandet. Det kan virke som om det er den regionen som er råka, seier ho.
I e-posten står det mellom anna: «Vi la merke til kontoen din er åpen et annet sted med nettverk IP-adresse». For å blokkere dette blir kunden bede om å klikke på ei lenke. E-posten er signert med Danske Bank.
– Vi jobbar på spreng for å analysere dette. Det er for tidleg å seie om dette kun gjeld Nordea-kundar, eller om også andre bankar kan vere råka, seier Strømstad i Nordea.
– Ein del av kvardagen
Kommunikasjonssjef Stian Arnesen i Danske Bank seier at denne type svindel vert stadig meir vanleg.
– Det har dessverre blitt ein del av bankkvardagen i 2014. Det aller viktigaste er at kundane er klar over at verken vi eller andre norske bankar etterspør slike opplysningar per e-post, seier Arnesen.
Strømstad i Nordea ber folk vere forsiktige.
– Som ein generell regel er det viktig å ikkje klikke seg inn på lenke i e-postar der du er usikker på avsendar, seier ho.
I desember i fjor gjekk tilsvarande e-post ut til fleire bankundar over heile Norge. Då fekk Danske Bank over 300 henvendelsar til kundesenteret sitt.
