Fleire blir smitta av korona: – Vi er førebudde på eit auka trykk

– Prøvene på sjukehusa viser at det er ei dobling av folk som er innlagde på grunn av korona. Det er også ei stigning av smittetilfelle blant dei innlagde, seier kommuneoverlege i Lillesand Thor-Erling Engemyr.

Det er tal frå sjukehusa som viser at smitten er i ferd med å ta seg opp.

Kommunane måler ikkje talet på smittetilfelle lenger.

Førebudd på fleire smittetilfelle

Folkehelseinstituttet (FHI) ber no kommunar og sjukehus om å vere førebudd på at innleggingar med korona kan auke utover hausten.

Ifølgje Engemyr er det ikkje overraskande at det kjem ein auke i smittetilfelle no.

– Det er heilt naturleg. Det ser vi kvar haust. Alle desse virussjukdommane får ein auke i løpet av hausten og vinteren.

Ikkje grunn til bekymring

Trass i auken i smittetilfelle treng ikkje folk flest å bekymre seg, meiner Engemyr.

– For dei aller fleste av oss er korona ein mild sjukdom. Men eg vil tilrå vaksne over 65 år og personar med kronisk sjukdom å ta vaksinen som blir tilboden i løpet av hausten.

Han vil også oppmode dei som er sjuke til å halde seg heime.

– Har du feber, er forkjølt eller sjuk bør du halde deg heime.

Engemyr seier Lillesand kommune er førebudd på å køyre ein offensiv vaksinasjonskampanje.

– Og vi er førebudde på større sjukefråvær blant våre tilsette.