Vipers gav Molde grisebank

– Vi starta litt trått og så spelar vi enkelt. Då får vi resultatet vi ynskjer og kan berre cruise inn til siger. Så lenge vi set forsvaret som vi gjer i deler av første og andre omgang, så er det gjort eigentleg, seier Vipers-spelar Marta Tomac til NRK.

Onsdag kveld var det nyopprykka Molde som fekk juling i Aquarama.

Til og med stjerneskotet Anniken Obaidli, som har blitt omtala som verdas største handballtalent, vart fleire nummer for små mot poengkåte Vipers-jenter.

20 minutt utan scoring

Etter at Mona Obaidli reduserte til 6-8 midtvegs i første omgang stengde heimelaget eige bur fullstending. Gjestene frå Møre og Romsdal scora ikkje eit einaste mål dei neste 20 minutta.

– Det seier litt om forsvaret vi set. Det er godt med ein kamp der vi slepp å slite og berre kan spele gjennom. Alle får prøvd seg og gjer ein god jobb. Dette er kjempebra, seier Tomac.

Gunnar Pettersen sitt Vipers-lag leia 14-6 til pause.

Molde fekk etterkvart hol på byllen igjen med to kjappe scoringar frå lagets profilar Anniken Obaidli og June Andenæs, men var aldri i nærleiken av poeng i Kristiansand.

Vipers vann oppgjeret 37-19 føre litt over 1000 tilskodarar.

– Det var ein god forsvarskamp i første omgang. Veldig god. Vi klarer å ta Anniken Obaidli heilt perfekt. Ho leika med oss i første seriekamp i år og eg føler jentene tok revansj no. Alt i alt bra å få brukt alle spelarane og fem juniorspelarar på slutten. Det har aldri skjedd i Vipers si historie tidlegare, seier Gunnar Pettersen.

Ut i Europa

Vipers står dermed med fem strake sigarar i serie og europacup. Klubben har vunne alle sine fire første kampar i 2016.

Det lovar godt føre returooppgjeret i europacupen mot polske Lublin førstkommande laurdag. Vipers vann den første kampen 28-22 på heimebane.