Bakgrunnen for at ho valde å ta systera ut av institusjonen var eit vedtak i Grimstad kommune. Vedtaket slo fast at pårørande berre fekk besøkje Fatima to timar dagleg. Vedtaket kom på 34-årsdagen til Fatima.
Familien kan klage
No har kommunen gitt beskjed om at dei likevel ikkje kjem til å setje i verk vedtaket.
– Så lenge det er mogleg å klage set vi ikkje i verk tiltak. Dersom pårørande klagar avventar vi fylkesmannen si uttale til vi eventuelt set i verk vedtaket, seier assisterande kommunalsjef for helse- og omsorg i Grimstad, Bente Somdal til NRK.
– Vi skal halde oss til den plikta vi har til å gi eit forsvarleg tenestetilbod. Det er det vi gjer, seier Somdal.
Saka Maljicai avviser tvert at det var slitsamt å ha systera heime. Samstundes meiner ho at ho har like stort ansvar for systera uansett kvar ho bur.
– Ho er mitt ansvar uansett om ho er heime hos meg eller om ho er på Landviktun i si eiga leilegheit, seier ho.
– Tek med meg Fatima heim
Maljicai er ikkje i tvil om kva ho vil gjere dersom vedtaket frå kommunen blir sett i verk.
– Det tidspunktet dei bortviser meg frå Landviktun og set i verk vedtaket, då tek eg Fatima med heim, seier ho.
Grimstad kommune har tidlegare fått kritikk frå pasient- og brukarombodet samt fleire brukarorganisasjonar. Det er påvist fleire ulovlegheiter, som fylkesmannen no seier at det er ordna opp i.
Advokaten til familien sa til NRK onsdag at vedtaket om at familien ikkje får besøke Fatima meir enn to timar om dagen er ulovleg.
– Det er heilt klart i strid med pasient- og brukarrettigheitslova. Eg tykkjer det er merkeleg at ein kommune lagar eit besøksforbod for dei næraste pårørande som har vore den viktigaste personen for Fatima, sa advokat Bodil Kristoffersen.