– Per no er vi einige om at dette ikkje er noko offentlegheita har behov for å vite, seier seksjonsleiar for etterforsking Arne Sundvoll til NRK.
Politiet er snart ferdig med å etterforske saka, men vil ikkje offentleggjere verken motiv for drapet eller dødsårsak.
Årsaka er at det er ein jamaldrande mindreårig gut (14) som er mistenkt for drapet.
Saka vil dermed ikkje bli behandla i rettssystemet.
Etterforsking mot slutten
– Vi gav veldig mykje informasjon i starten. Meir enn vi pleier i starten på ei drapssak. Det betyr at vi har gitt det meste. Dette er ei sak med mindreårige og denne saka vil gå til barnevernet, seier han.
Tidlegare denne månaden sa lensmann i Søgne og Songdalen, Terje Pedersen, til TV2 at Alma Gabriela Knutsen døydde av drukning. NRK har aldri fått stadfesta dette av politiet.
– Den taktiske etterforskinga nærmar seg slutten. Vi har ikkje så mange fleire avhøyr vi skal gjennomføre. Vi ventar på svar på tekniske undersøkingar frå Kripos og Folkehelseinstituttet. Om det vil gje grunnlag for å gjere nye avhøyr veit vi ikkje, seier Sundvoll.
– Har politiet danna seg eit bilete av kva som har skjedd?
– Vi har eit klart bilete av kva som har skjedd. Det har vi hatt sidan vi sette i gong drapsetterforsking etter forklaring frå mistenkte, seier han.
Barnevernet tek hand om guten
Den mistenkte 14-åringen er no teke hand om av barnevernet og er flytta frå Søgne.
Alma Gabriela Knutsen vart funne død i Søgneelva 30. august etter å ha vore sakna i to døgn.
Då ho vart funne var det ikkje mistanke om at noko kriminelt hadde skjedd.
To veker seinare kalla politiet inn til pressekonferanse der dei fortalde at ein 14 år gammal gut hadde tilstått å ha drepe jenta.