Ein av dei minst besøkte kommunane i Noreg: – Eg heldt på å sette kaffien i halsen

– Eg heldt på å sette kaffien i halsen då eg las det, fortel Kristin Ljosland.

Slik reagerte frolandspatrioten da ho las Aftenpostens artikkel om dei minst besøkte kommunane i landet i sommarvekene.

På lista over dei topp ti minst besøkte kommunane, ligg nemleg Froland på Sørlandet.

Tala tek utgangspunkt i kortbruk frå turistar i veke 25–32 i fjor. I undersøkinga blir turistar definerte som folk som til vanleg bur andre stader i Noreg.

Utanlandske turistar er altså ikkje rekna med.

Lokal guide

Sørlandskommunen grensar blant anna til dei populære sommarbyane Arendal, Tvedestrand og Grimstad.

For å teste attraksjonane til kommunen, reiser NRKs reporter ut med lokalpatrioten Kristin Ljosland som guide.

Ho meiner det er meir enn nok av attraksjonar i Froland.

– Det blir ingen problem å motbevise dette, seier Ljosland.

Dagnys Kompebu

Første stopp i Froland er Dagnys Kompebu, driven av Dagny Åsen. Ho er i full gong med å lage kompar.

Åsen fortel at ho i løpet av éin dag kan lage opp mot hundre kompar.

Værkshuset Froland

Vidare går turen til Værkshuset Froland. Ljosland fortel at besøkande no kan overnatte i lokalet.

Det blir drive av eldsjelene Kathrine og Rune Åsmundsen.

– I løpet av hausten skal det stå ulike musikarar på scena, det blir servert mat og andre kulturelle innslag, seier Rune Åsmundsen.

Frolands Verk

Deretter tek lokalguiden NRKs reporter vidare til eit stort og ærverdig bygg: Frolands Verk.

Her blir det også tipsa om mange fine turar i området.

Lokalguiden bankar på døra. Når Rune Åsmundsen opnar, knirkar det godt i det gamle bygget frå 1791.

Det var også her festen blei halden då kongeparet kom på besøk i mai i år.

Åsmundsen fortel at det er mykje historie rundt Frolands verk.

– Ein heilt spesiell person har døydd her, seier han.

Han fortel at den kjente matematikaren Niels Henrik Abel vart forlova med ei tenestejente som jobba der.

Han brukte mange feriar der og i 1829 døydde han på bukkerommet.

SMIA Bar

Ordførar Inger-Lene Håland står saman med Agnes Wagner utanfor Smia Bar.

13-åringen har fått den første sommarjobben sin i kiosken.

Gjengen rundt kiosken avsluttar dagen med ein is.

NRKs reporter konkluderer etter dagens oppdrag:

– Det ser ikkje ut til at dette er feil stad å vere om sommaren, seier ho.