Personen vart teken på land av meddykkarar, men livet stod ikkje til å redde.
Alle naudetatane rykka ut til staden då meldinga kom ved 15-tida laurdag.
Meddykkarar fekk vedkomande på land, og det vart gitt livreddande førstehjelp på staden.
Personen vart erklært død på staden av lege, melder politiet.
Erfarne dykkarar
Innsatsleiar i politiet, Hans Waage, opplyser at det er snakk om eit følgje med erfarne dykkarar som har hatt tilhald på Trysnes Marina og feriesenter.
– Dei skulle berre ha eit kort dykk i dag rett utanfor Trysnes, og dykka makkervis. Han som er forulykka dykka saman med ein kamerat, og då dei var ferdige å dykke og skulle opp så oppdaga kameraten at vedkomande ikkje var komen opp. Han går ned igjen, og etter noko tid finn han den avdøde på omtrent 30 meters djup.
Den omkomne vart då bringa til land, men viste ingen livsteikn.
40 minutt under vatn
Ifølgje Waage viser vitneopplysningar at mannen var under vatn i 40 minutt eller meir.
– Det er vanskeleg å seie kva som har gått gale, det vil forhåpentlegvis den tekniske undersøkinga gi svar på. Men dette er erfarne dykkarar som dykkar med utstyr som er tiltenk erfarne dykkarar, så vi veit førebels ikkje årsaka til ulukka.
– Vi må vere nøye med Kripos og varsling av pårørande. Difor ønskjer vi førebels ikkje å gå ut med fleire opplysningar, seier operasjonsleiar Martin Ugland i Agder politidistrikt.