Drittlei av hundebæsj på gata

– Det går ikkje an. Trur dei at det forsvinn sjølv om det ligg i snøen? Det gjer det jo ikkje. No dukkar det opp alle vegar. «Krekslig», seier ein vi møtte fredag ettermiddag.

– Dei bør ta opp dritten etter seg, seier ein annan.

Du har sikkert sett dei sjølv. Kanskje har du også vore så uheldig at du har trakka i hundebæsjen i Kristiansand sentrum.

Vil ikkje rydde

Mange reagerer på at hundeeigarar droppar å plukke opp bæsjen etter hunden sin. Det er kommunen som må rydde opp dritten, men det skjer ikkje med det første.

– Det er ikkje lett å feie fortaua når det ligg snø der. Det er vanskeleg. Grusen som ligg på fortaua ynskjer vi at skal liggje der så lenge det er snø og is, seier avdelingsleiar i ingeniørvesenet i Kristiansand, Per Kjelsås til NRK.no.

Kommunen har vurdert å ta i bruk stativ og automatar med posar, for å gjere det lettare for hundeeigarar som gløymer å ta med pose på tur.

Men avdelingsleiaren meiner at det hadde vore heilt feil bruk av pengar.

– Feil bruk av pengar

– Det er ikkje slik at skattebetalarane skal betale for hundehaldet til folk. Det er ikkje riktig. Det står jo i politivedtektene at ein skal fjerne hundebæsj som hundeeigar, seier Kjelsås.

Fram til våren må kristiansandarane altså bu seg på å sjå hundebæsj i gatene.

– Eg tykkjer det er veldig trist. Du må liksom sjå deg for heile tida når du går tur. Det er jo så fint elles her, seier ein vi møtte på gata.