Mannen er også dømd til å betale nesten 420 000 kroner i oppreising og erstatning. 29-åringen sa seg skuldig i Lister tingrett.
5. september 2014 storma to maskerte og væpna menn inn i butikken. 29-åringen retta ein pistol mot hovudet til ein av dei tilsette i butikken.
Den andre knuste glasmonter og ribba butikken for smykke og ringar. Butikken ligg berre 400 meter frå lensmannskontoret i Lyngdal.
Då politiet kom til staden var ranarane borte. Dei fekk med seg varer til kring 300 000 kroner.
Avslørt av sigarettsneip
14. september fann politiet ein stolen bil på Kvinesheia. I bagasjen vart det funne glasfragment som stamma frå gullsmeden.
Der vart det også funne ein sigarettsneip. Det var denne som førte politiet til 29-åringen som no er dømd. Politiet fekk ut ein DNA-profil og fekk treff i DNA-registeret.
Litauaren er også tidlegare dømd for ran. I 2011 rana han ein urmakar i Sarpsborg. Mannen var ferdig med å sone dommen i 2013.
Fekk ordre
I retten forklarte mannen at han jobba ved ein fabrikk i Norge i eit halvt år. Då han mista jobben kom han i kontakt med ein tidlegare kamerat. 29-åringen forklarte at han hadde gitt uttrykk for at han ville ta kva som helst slags jobb – anten det var lovleg eller ikkje.
Det var då han vart sett i kontakt med to personar som tilbaud han om å vere med til Norge for å rane butikkar. Han forklart at han reiste saman med tre andre til Stockholm.
Her delte dei seg. 29-åringen og ein annan reiste til Norge.
Ifølgje litauaren vart ein bakmann att heime i Litauen. Herifrå gav han orde om kvar dei skulle reise og kva butikkar dei skulle rane.
Han forklarte også at dei vart utstyrt med gasspistol og utstyr for å knuse glas, i tillegg til spesialutstyr for å stele bilar. Ransvåpenet er ikkje funne.
Skulle rane urmakar i Trondheim
Planen var først å rane ein urmakar i Trondheim, men dei vurderte at risikoen var for stor. Same dag skal dei ha fått beskjed om å reise til Lyngdal der dei rana Gullsmed Asbjørn Opsal.
Mennene køyrde tilbake til Litauen etter ranet. Der skal det ha oppstått ein krangel om ransutbyttet.
29-åringen hevda i retten at han vart banka opp utan å få noko som helst. Seinare skal han ha blitt skulda for å ha gjeld til den same personen. Mannen rømte til Italia der han seinare vart pågripen.
Den andre mannen er framleis på frifot. 29-åringen hevda i retten at han ikkje veit kva han heiter.
