Problema startar når vatnet frå boblebadet blir slept ut i naturen. Kristiansand kommune krev no at avfallsvatnet frå bassenga skal nøytraliserast før det går i elva. Årsaka til at kommunen tek opp forskriftene om utslepp, er at det søkjast om tre utandørs boblebad i eit leilegheitsbygg på Kjøita ved Otra.
- Les også:
Uheldig for omgivnadene
Miljøvernrådgivar i kommunen, Marianne Bliksås, seier dei vil ha ein plan dersom det etablerast mange boblebad i eitt område.
– Vi ønskjer å behandle alle boblebada på lik måte, og finne ei fornuftig løysing dersom fleire vil etablere det på den same måten.
Ifølgje Bliksås kan det vere uheldig for omgivnadene å ha for mange utandørs boblebad i eitt område. Kommunen krev difor at avfallsvatnet må nøytraliserast før det sleppast ut i det fri.
– Ein er alltid pliktig til å unngå å forureine.
Overraska over salet
Hos Agder Spa i Vennesla har dei selt rundt 30 boblebad sidan oppstarten i mars. Ifølgje dagleg leiar Espen Vige, var dette meir enn forventa.
– Vi var overraska over kor mange boblebad vi selde på så kort tid.
Han fortel at dei alltid opplyser kunden om korleis reglane er i forhold til tømming.
– Vi kursar kundane på dette, men i forhold til utslepp så kan ein sleppe dette fritt ut kvar som helst. Det er ikkje noko problem.
- Les også:
Kan bli aktuelt å lage planar for område
Til no har det vore relativt lite kontroll på kvar utsleppa frå boblebada går. Bliksås seier det kan bli aktuelt å lage planar for område der det skal etablerast fleire.
– Den største utfordringa med desse er viss ein har ein sårbar bekk i nærområdet sitt, og vel å sleppe dette vatnet rett i bekken, seier Bliksås, og understrekar at mange boblebad på eit avgrensa område kan gjere situasjonen meir utfordrande.