Birkeland gjorde som kjærasten

– Det var utruleg kult å sjå Fanny i går. Det viser at det er mogleg å kjempe i toppen på ein maksdag, seier Birkeland til NRK.

Laurdag gjekk Birkeland inn til siger på jaktstarten i IBU-cupen i Ridnaun-Val Ridanna i Italia. IBU-cupen er nivået under verdscupen der dei beste skiskyttarane i verda konkurrerer.

Solid skyting

Birkeland gjekk ut 13 sekund bak russiske Alexey Slepov. Men feilfri skyting gjorde at sørlendingen gjekk i mål nesten halvminuttet føre Slepov.

– Det var god skyting med 20 treff. Eg har slite litt med skytinga i det siste. Elles var det tungt i sporet med veldig kraftig snøvêr. Det var eit jobbeløp, men eg klarte å gå jamnt og trutt, seier han.

Kanskje var det kjærasten sin første siger i verdscupen som inspirerte.

Mange vart overraska då Fanny Welle-Strand Horn slo verdseliten og tok sin første verdscupsiger på sprinten fredag - inkludert Lars Helge Birkeland.

• Les også: Skiskytterledelsen: – Seieren letter presset

Overraska over kjærasten

– Det var overraskande at ho vann. Eg trudde ho kunne kjempe om ein pallplass på ein maksdag. Men at ho skulle vinne hadde eg ikkje trudd, seier han.

– Kva var det første ho sa til deg når du snakka med ho på telefon etter løpet?

– Ho spurte korleis det hadde gått med meg, ler han.

Sigeren betyr truleg at Birkeland igjen kan vere aktuell for verdscupen.

– Eg har ikkje høyrt noko. Dei som går verdscup gjer det veldig bra, så det er ikkje sikkert eg kjem meg inn igjen med det første, seier han.

Trur på suksess

Kjærasten vinnarløp laurdag gjer at også han sjølv trur på topplassering i verdscupen om han får sjansen.

– Eg ser at det er mogleg når Fanny klarte det. Det er det som er målet ein dag, å stå på toppen i det gjevaste selskapet, seier Birkeland.

Birkeland står så langt med ein 2. plass på sprinten, og altså 1. plass på jaktstart i IBU-cupen denne helga. Søndag går sørlendingen mixstafett.