– Rifla vart funne rett ved vegen. Der går jo barn heile tida. Det er litt skummelt, seier Christine Løvendahl Nodeland til NRK.
Dei tre 3.-klassingane gjekk til nabohuset for å varsle vaksne om funnet. Nodeland sat ute på verandaen då gutane kom springande fredag ettermiddag.
Det vart også funne både pusseutysr og våpenkasse.
Foto: Christine Løvendahl Nodeland– Dei fortalde at dei hadde funne eit gæver. Eg ringde typen min og politiet og tok med ungane opp til staden, seier ho.
Forsvann i innbrot
Politiet var opptekne med redningsaksjon på Lista der RS «Ægir» gjekk rundt to gonger etter å ha blitt teken av brottsjø.
Nodeland vart difor bede om å ta med rifla og levere den på lensmannskontoret.
– Det er nesten litt rart at den ikkje er funne tidlegare, sidan den låg like ved vegen.
Ifølgje Lister 24, som omtala saka først, vart rifla stole i eit innbrot i eit hus i Farsund sentrum 11. desember i fjor.
Hugsa ikkje kvar han hadde lagt rifla
Same dag vart ein mann pågripen. Men han klarte ikkje å forklare kvar han hadde gjort av rifla fordi han hadde vore rusa då han stal rifla.
– Etter det eg har fått opplyst var rifla litt rusten då den vart funne. Det kan godt vere at den har ligge på same staden heile tida frå innbrotet. Det er ikkje så langt frå der innbrotet vart gjort i sentrum og opp til skulen, seier politibetjent Benth Castberg på Farsund lensmannskontor.
Christine Løvendahl Nodeland er glad for at barna gav beskjed til vaksne om at dei hadde funne rifla.
– Eg er glad for at gutane som fann våpenet forstod at det kunne vere farleg, seier ho.
