– Det er frå tid til annan bølgjer av tjuveri som skjer over større geografiske område. Då er det som regel mobile vinningskriminelle som er på ferde, seier Torgeir Winsnes, leier for seksjon for etterretning i Agder politidistrikt.
Dei siste vekene har politiet sett ei auke av tjuveri av GPS-einingar, både frå lastebilar og frå landbruksmaskiner i fleire politidistrikt i sør-Noreg.
I dag går politiet i Agder derfor ut med ei melding til næringslivet. Dei ønsker å åtvare bransjen spesielt, sånn at dei kan sikre seg.
– Vi ønskjer å informere og åtvare om det vi trur er aktive og mobile vinningskriminelle i Agder, og dessutan kva bedrifter kan gjere for å sikre verdiane sine, seier næringslivskontakt i Agder politidistrikt, Eirik Berg Thorsrud.
Han legg til at dei også har sendt ut informasjon om dette direkte til aktuelle bedrifter i Agder.
Store verdiar
Det er og fleire andre politidistrikt i landet som melder om liknande tjuveri.
Mobile vinningskriminelle har gjerne heile landet som nedslagsfelt og stel for å selje vidare, opplyser politiet.
Det skjer primært på natta og det er store verdiar som stelast.
– I eit av tjuveria i Agder vart det stole for om lag 300.000 kroner.
Natt til 3. mars vart dei første tjuveria oppdaga i Agder.
Denne veka har det vorte rapportert om tjuveri av GPS-einingar frå elleve ulike Volvo-lastebilar i Birkenes.
Det har også vorte gjort tjuveri frå anleggs- og landbruksmaskiner i Grimstad og Farsund.
Tips frå politiet til verksemdene for å sikre køyretøy og utstyr:
- Sikre dyrt utstyr når dette ikkje er i bruk, ved til dømes å parkere traktorar, lastebilar eller anleggsmaskiner i videoovervakt område, eller på sikkert område.
- Ta ut dyrt utstyr når køyretøy eller maskinar blir forlatne i eit lengre tidsrom, til dømes over natta eller i helga.
- Hald jamleg auge med lastebilar, traktorar, grave- og anleggsmaskiner når desse er parkerte.
Hei. Har du tips om denne eller andre saker?
Jeg er vaktsjef, programleder og reporter i NRK Sørlandet. Tips meg gjerne om saker som du synes er viktige, spennende, triste, morsomme eller interessante.