Olsen har ikkje levert si innstilling i sjukehusdebatten, men gjekk langt i å frede sjukehuset i Flekkefjord dei neste 16 åra.
– Alt indikerer at sjukehuset må vere eit velfungerande sjukehus fram til 2030, sa sjukehusdirektøren på folkemøtet i Ueneshallen i Flekkefjord torsdag kveld.
På ein stor konferanse i januar la ei prosjektgruppe fram sitt forslag for sjukehustilbodet fram til 2030. Der vart det føreslått eitt sjukehus i Agder. Dette har ført til at mange fryktar at sjukehuset i Flekkefjord blir lagt ned.
Nær 5000 i fakkeltog
I si tale torsdag påpeika Jan Roger Olsen mellom anna at det er viktig å ha eit velfungerande fødetilbod på sjukehuset. Om lag 100 av fødslane som skjer ved sjukehuset årleg er rogalendingar som føder.
Om lag 800 personar var samla i Ueneshallen i Flekkefjord til folkemøtet. Tidlegare torsdag kveld deltok nær 5000 menneske i fakkeltog for sjukehuset i Flekkefjord.
– Befolkninga ynskjer nærleik til sitt sjukehus. Vi meiner at det er betre enn å ha spesialistar på alle nivå. Sjukdom er så mykje forskjellig. Når det gjeld til dømes fødetilbod er ikkje det ein sjukdom. Dei kan utmerkt føde på eit lite sjukehus, seier leiar i aksjonsgruppa for sjukehuset i Flekkefjord, Sigmund Kroslid.
NRK oppdaterer saka.