– Dette er eit område som inneheld mange interessante attraksjonar, natur og mange opplevingsverdiar. Vi har sett at dette ikkje har noko særleg trekkraft i forhold til turisme, seier Tarald Myrum, som er leiar i styret for verneområdet.
Han peikar på at status som nasjonalpark kan gjere det enklare å trekkje turistar til området.
– Ein nasjonalpark er det som trekkjer internasjonalt. Sjå på Jotunheimen, Rondane og Hardangervidda. Dei har heilt andre attraksjonsverdiar, seier Myrum.
Pengar å hente
Fylkesmann Øystein Djupedal er positiv til nasjonalpark i Setesdal.
Foto: Sundsdal, Svein / Svein Sundsdal/NRK
Setesdal Vesthei Ryfylkeheiene landskapsvernområde kan bli nasjonalpark.
Myrum er ordførar i Valle og har bede kommuneadministrasjonen utgreie moglegheitene for ein nasjonalpark.
Myrum får støtte av fylkesordførar i Aust-Agder, Bjørgulv Sverdrup Lund.
– Det er heilt riktig om ein ynskjer å utnytte verdien desse områda kan ha for setesdalskommunane, seier Sverdrup Lund til NRK.
– Det har vist seg, at dersom du driv nasjonalpark, så får du midlar til drift og auka verdiskaping. Eit verneområde har ikkje same klang, seier fylkesordføraren.
– Veldig gledeleg
Eit notat er førebels lagt fram til drøfting i styret i verneområdet. Styret er sett saman med representantar frå alle kommunane i verneområdet.
Fylkesmann i Aust-Agder Øystein Djupedal likar tanken om ein ny nasjonalpark.
– Eg tykkjer det er veldig gledeleg. Ein nasjonalpark er ei heilt anna form for marknadsføring, som allereie ligg i landskapsvernområdet, seier Djupedal til NRK.
Kan bli den andre nasjonalparken
Det er allereie klart at Raet på kysten av Aust-Agder og Jomfruland i Kragerø blir nasjonalpark.
I mai i år vart dei første skissene til eit besøkssenter for Raet nasjonalpark presentert.
– Dette viser at vi har viktige naturverdiar vi vil vise fram til folk. At også Setesdal kan få ein nasjonalpark gler meg veldig, seier Djupedal.
Sjå intervju med Tarald Myrum og fylkesordførar i Aust-Agder, Bjørgulv S. Lund.
