– Vi oppdaga det i førre veke. Det var litt spesielt å sjå at den eine veggen var måla over, seier Irene Ikdal som er rådgjevar for visuell kunst i Vest-Agder fylkeskommune.
Det var Iben Sandemose som hadde laga verket som bestod av fem bilete i eit møterom. No er det berre fire att.
– Dette kom som eit sjokk på alle som jobbar her, seier Ikdal.
– Dette er hærverk
Møterommet heiter «Hagen», medan utsmykkinga heiter «Jungelen». Kunstverket vart kjøpt til høgskolen i Agder i 1992.
Heller ikkje kunstnaren sjølv var informert om at verket skulle målast over.
– Vi kan berre seie at dette er hærverk. Det er liten respekt for den offentlege kunsten, seier Ikdal.
Kunstnar Iben Sandemose fekk beskjed om at kunstverket var fjerna torsdag.
– Dette tykkjer eg ikkje noko om. Eg har tenkt på det etterpå. I desse miljøtider, så har ein altså slakta ein heil jungel i Kristiansand. Det tykkjer eg er trist, men den kan gro til igjen med mi hjelp, seier ho.
Vil lage nytt kunstverk
– Eg skulle ønske eg kunne laga det opp igjen. Det hadde vore veldig fint, seier Sandemose.
Sandemose reagerer på at ho ikkje vart informert om at veggen skulle målast.
– Det handlar jo rett og slett om å snakke med folk. Å vere skikkelege. Det er irriterande, seier ho.
Det er eigedomsselskapet Entra som eig og driftar fylkeshuset i Kristiansand, og som måla over kunsten for å lage eit betre møterom.
– Det var behov for å få på plass ei ny løysing for ein dataprosjektør. Då valde vi å måle over den eine kortveggen i rommet som er ein del av moderniseringa av rommet, seier kommunikasjonsdirektør Tom Bratlie.
– Vi burde hatt dialog
Det var Kunst i offentlege rom (KORO) som kjøpte kunsten i 1992.
Dei seier til NRK at kunstnaren skal varslast i god tid dersom eit kunstverk må fjernast.
Ei av årsakene er at ein skal få høve til å dokumentere verket før det forsvinn for alltid.
– Eg beklagar litt at vi ikkje har hatt kontakt med kunstnaren på førehand. Vi kan ikkje love at utfallet hadde blitt noko anna, men det er klart at vi burde ha hatt ein dialog. Det kan vi ta sjølvkritikk på, seier Bratlie.