– Det blir ikkje mykje poeng av heiderlege resultat. Det er tre lag som rykte ned frå eliteserien i fjor og vi har teke poeng i samtlege kampar. Vi føler vi kunne ha teke meir poeng i alle desse kampane, seier Andersen til NRK.
Måndag kveld sjokkerte Jerv eit Brann-lag, som allereie er i poengnaud. Grimstad-klubben pressa bergensarane tilbake på bana og gjekk til pause i leiinga 2-0.
VIDEO: Sjå intervju med Jerv-kaptein Glenn Andersen.
Brann slo tilbake
– Eg er god nøgd med mykje. Første omgang var god og vi leiar fullt fortent til pause. Brann hadde vel knapt eit skot mot mål. I andre omgang var Brann meir aggressive og flytta opp Karadas. Dei slo lange ballar og kom inn i kampen, seier trenar Steinar Pedersen.
Brann reduserte på straffespark åtte minutt ut i andre omgang. Ti minutt seinare utlikna Jakob Orlov for gjestene.
Dermed vart det igjen eitt poeng på Jerv mot eit lag som er venta å kjempe om opprykk.
– Vi har ein bra gjeng med gode fotballspelarar. Det overraskar meg ikkje at vi har fått bra resultat mot gode lag. Men vi ynskjer å vinne fotballkampar. Eitt poeng er ikkje nok, seier trenaren.
VIDEO: Sjå intervju med Jerv-trenar Steinar Pedersen etter kampen mot Brann.
Jaktar nye poeng
– Vi kunne kanskje ha teke tre poeng mot Brann, men slik er det. Vi er bra nøgd med mykje av det vi gjer, seier Pedersen.
No ventar Hødd i Ullsteinvik førstkommande torsdag.
Allereie til helga er det klart for ny kamp på Levermyr. Då kjem Strømmen på besøk.
– Det var ein fantastisk ramme rundt kampen mot Brann med mykje folk. Eg håpar mange av dei kjem tilbake søndag. Det er tett kampprogram no, så det er berre å køyre på, seier Pedersen.
