– Vi kjem ikkje til å legge oss bakpå

– Vi skal gå ut å vere oss sjølve. Vi har spelt 15 bortekampar tidlegare i år. Vi har ikkje turt å ikkje vere oss sjølv nokon gong, seier Jerv-trenar Arne Sandstø.

Jerv har skaffa seg eit godt utgangspunkt før returmøtet på Nadderud stadion. Michael Ogungbaro si scoring på Levermyr onsdag skiller laga før dei siste 90 minutta.

– Etter ein del bortekampar denne sesongen har trenaren til motstandaren sagt at det er det desidert beste laget dei har møtt i år. Det er god ros i seg sjølv, og viser at gutta torer å vere seg sjølv, seier Sandstø.

• Les: – Det blir «sjampis» og spetakkel

– Ekstra spesielt

Jerv har ein god bortestatistikk å vise til denne sesongen. Laget har berre tapt fem bortekampar. Stabæk har tilsvarande dårleg heimestatistikk.

Bærumsklubben har kun vunne fem heimekampar i år. Berre Start var dårlegare i eliteserien.

Andreas Hagen har spelt i den danske toppserien med Viborg. Han vedgår at spel i Norges øvste divisjon med Jerv vil bli spesielt.

– Eg har vore så mange år i Jerv og kjenner klubben inn og ut. Jerv har blitt klubben i mitt hjarte etterkvart. Så det gjer det ekstra spesielt, seier Hagen.

Også Hagen trur nøkkelen til suksess mot Stabæk er «enkel».

– Det blir vel å angripe som i ein vanleg kamp. Vi kjem ikkje til å legge oss bakpå. Eg trur vi skal ut å tore å spele. Det er vår måte å vere på uansett scenario, seier Hagen.

På sidelinja har Jerv ein særs rutinert trenar. Arne Sandstø trente Odd i ei årrekke og vann mellom anna cupfinalen med skiensklubben.

I tillegg har han opprykk med Start på CV-en. Han har også leia Løv-Ham i kvalifisering tidlegare.

Hevdar han ikkje er nervøs

– Eg har komme i ein fase der ikkje er nervøs i det heile. Det er jo alltid litt spenning når kampen startar, men akkurat no kan vi ikkje gjere anna enn å trene godt, seier Sandstø.

Hagen er sikker på at Jerv kan lage trøbbel for Stabæk også på bortebane.

– Vi må opp på toppnivået vårt om vi skal klare det. Vi møter eit godt lag. Vi har nivået inne for å ta dei, seier han.

– Får vi spelet til å flyte, så trur eg dei skal få problem med oss. Samstundes må vi demme opp for styrkene deira. Dei har nokre gode individualistar. Det blir jo tøft, seier midtbanespelaren.