– Vi kan nå finale i sluttspelet

– Det var i sluttspelet det løsna for oss i fjor. Då gjekk vi til finale og det kan vi gjere igjen, seier Michelsen til NRK.

Arendalittane sikra plass i sluttspelet etter at dei slo Bækkelaget i siste serierunde onsdag kveld.

Det er klart at sørlendingane skal møte Elverum, Bækkelaget og Bodø i kvartfinalane.

– Stor optimisme

Mot alle odds kjempa laget seg til finalen i sluttspelet i fjor der seriemeister Elverum vart for sterke.

– Vi er litt tynt besett på grunn av skader og må spele mykje på dei same spelarane. Det kan redusere våre moglegeheiter, seier han.

• LES: ØIF-sluttspill kan bli dyrt

– Men andre lag har dei same problema med skader og slikt, så vi går inn i sluttspelet med stor optimisme, seier Michelsen.

Det har vore ein turbulent sesong for dei raude og svarte i Arendal. I desember fekk trenar Leif Gautestad sparken etter dårlege resultat. Då Asle Gran tok over trenarjobben var målet å berge plassen i eliteserien.

– Vi har hatt fokus på å overleve dei siste vekene og kampane. Så, som eg seier er sluttspelet ein kjempebonus, seier Michelsen.

Også kantspelar Sondre Paulsen har tru på at arendalittane kan bite godt ifrå seg i sluttspelet.

– Vi kan senke skuldrene, kose oss og berre spele handball, seier han.

– Viktigast å sikre plassen

Før sesongen sette klubben seg mål om å vinne ein tittel. No kan tittelen komme i sluttspelet.

– Det er kanskje ikkje realistisk at vi skal stå heilt inn med ti kampar med ein såpass tynn stall som vi har. Men vi skal gå på bana i kvar kamp for å vinne. Vi kan byggje lag og enkeltspelarar. Det viktigaste var å sikre plassen i eliteserien, og det har vi gjort, seier han.

• LES: ØIF har 15 spillere på ønskelisten

Trenar Asle Gran skulle i utgangspunktet leie laget ut eliteseriesesongen. No blir trenarvikariatet forlenga fram til sluttspelet er over.

– Eg veit ikkje kva mål vi skal ha i sluttspelet. No skal eg feire dette, så får vi sjå etterkvart, seier han.