Heile familien hadde lagt seg då dei vakna av at det ringde på døra ved 01-tida natt til tysdag.
Ringinga vart etterfølgt av intens banking.
– Vi trudde først det var nokon som berre sprang forbi. Men så gjekk mannen min opp og såg ut kjøkenvindauget. Plutseleg høyrde eg han springe over golvet og ropte at det brann, fortel ho.
32 personar evakuert
Lilledrange fann fram varme klede og vekte dei tre borna så raskt ho kunne.
– Så var det berre rett inn i bilen og rett opp til svigerforeldra mine der vi har vore i natt. Mannen min har vore her i heile natt og bore ut ein del ting i garasjen, fortel ho.
Til saman 32 personar vart evakuert frå 11 hus vel ein kilometer frå Flekkefjord sentrum. I fleire timar forsøkte brannvesenet å få kontroll over brannen.
To hus er totalskadd etter brannen.
Ingen personar skada
Huset til Lilledrange er påført store vass- og røykskadar.
– Det er tydeleg at dei har brukt mykje vatn. Dei har også slått hol i golvet, seier ho.
No er ho glad for at ingen personar vart skada i brannen.
– Eg tenkte det var godt at vi kom ut. Då vi kom ut var det ganske mykje brannfolk på plass allereie, så eg tenkte at det var sjanse til at vi fekk redda ut noko frå huset også, seier ho.
Ukjend brannårsak
Like før klokka sju varsla brannvesenet at dei hadde kontroll over brannen.
Bebuarane som bur i husa som ikkje er skada fekk då beskjed om at dei kunne gå tilbake til husa sine.
Det er framleis ikkje kjent kva som starta brannen. Krimteknikarar skal gjere undersøkingar så raskt det er mogleg.
Ifølgje avisa Agder var det ei ung jente som vakna av knitring og varsla frå om brannen.