– Det hadde vore vanvittig gøy for heile Sørlandet. Då trur eg dei fleste, også dei som ikkje er interessert i fotball, hadde komme på kamp. Sørlandet får glede seg om det skulle skje, seier Start-spissen Lars-Jørgen Salvesen til NRK.
– Det er jo draumen til alle på Sørlandet at Jerv og Start møtest. Det hadde vore gøy, seier Jerv-toppscorar Ohi Omoijuanfo.
Start kjempar for å unngå nedrykk frå eliteserien. Klubben ligg på kvalifiseringsplassen før siste serierunde søndag. Laget ligg eitt poeng føre Mjøndalen før den avgjerande runden.
– Tenke ingenting på det
Same dag skal Jerv ut i den første kvalifiseringsrunden i 1. divisjon. Laget sikra kvalifiseringsplass på overtid i siste serierunde førre helg.
– Jerv er eit godt lag og må komme seg gjennom det første hinderet og vi må gjennom vårt hinder, seier Start-spelar Daniel Aase.
For det er framleis mykje som må gå vegen før dei to laga møtest i kvaliken. Start må først og fremst sikre kvalifiseringsplassen i eliteserien. I tillegg må altså Jerv slå Hødd på Høddvoll. Skulle det skje ventar ein ny kvalifiseringskamp mot vinnaren av oppgjeret Kristiansund - Ranheim.
– Eg tenker førebels ingenting på det. Vi kjem ikkje dit om vi ikkje slår Hødd. Men eg forstår fokuset og interessa frå publikum og media. Eg forstår at folk syns det er tidenes kamp og bla, bla, bla. Men vi er ikkje der. Vi skal til Høddvoll å gjere ein jobb, seier Jerv-trenar Steinar Pedersen.
– Har du ikkje tenkt tanken?
– Viss ikkje hadde det vore umenneskeleg. Men det handlar om å fjerne tankane som ikkje har noko i hovudet på gjere, ler han.
– Alt kan skje
Jerv sin toppscorar Ohi Omoijuanfo blir Stabæk-spelar neste sesong, men håpar å sende Jerv til eliteserien før det.
Han trur det er fullt mogleg å slå Start i kvalifiseringa.
– Dei har ikkje vore så bra i år og er nedbrotne. Det er fullt mogleg å slå dei. Dei skal vere eit betre lag enn vi er, men fotballen er rundt og alt kan skje i fotball, seier han.
– Det er vanskeleg å seie kven som vil vere favoritt. Dei har hatt ein vanvittig opptur i år og klarte kvalik i siste sekund. Klarer dei å komme seg gjennom kvaliken har dei ingenting å tape, seier Salvesen.