– Spesielt med så mange brannar på så kort tid

– Dette er sjølvstendige brannar som vi ikkje ser nokon samanhengar mellom, seier leiar på krimteknisk avdeling i Agder-politiet, Gunstein Kalhovd.

Natt til fredag vart eit bustadhus i Risør totalskadd etter ein brann. Dette er berre ein av fleire liknande episoder i det siste.

Dette er nokre av brannane NRK har omtala:

• 3. februar vart eit bustadhus i Risør totalskadd. Ingen skadde. Førebels ukjent brannårsak.
• 27. januar vart eit trehus på Munkejordet i Arendal overtent. To personar redda ut.
• 27. januar var det ein brann i eit rekkehus i Vågsbygd i Kristiansand. Ingen skadde. Brannårsak førebels ukjent.
• 27.januar brann delar av ei kommunal attføringsbedrift i Arendal ned til grunnen. Ein person omkom.
• 25. januar vart tre personar sendt til legevakt med røykskadar etter ein brann i eit bustadhus i Arendal.
• 18. januar brann det ved eit dynamittlager på Mjåvann Industriområde i Songdalen.

Fellestrekk

Kalhovd meiner det er spesielt med så mange like brannar på så kort tid.

– Det vi registrerar kvart år er at når vi får kuldeperioder så får vi også ei oppblomstring av brannar. Det er klassisk kvart år, seier han.

Til no i år har politiet allereie arbeidd med eit titalls brannar i Agder.

– Sidan nyttår har vi på vår avdeling vore involvert i nærare 20 brannar, og det er omfattande brannar med totalskader.

Trass i at brannane ikkje har nokon samanheng, viser Kalhovd til at det er nokre fellestrekk som går igjen.

– Folk er uvørne med tilkopling på straum, til dømes ladarar. Det er også dårleg tilsyn med det elektriske anlegget i bustaden.

Uforsiktig bruk av stearinlys og tømming av vedomn er også gjengangarar i boligbrannar.

Kalhovd fortel at folk gjerne set bøtter med aske på terrassen etter tømjing, og at dette ikkje er særleg lurt.

– Det er klart at med litt vind så byrjar dette å brenne.

Vanskeleg å finne årsaka

Med så mange branntilløp er det mykje ressursar som går med. Kalhovd fortel at dei seinast denne veka var fire-fem mann ute på ulike brannar samstundes.

Ofte er det krevjande åstader dei må arbeide på.

– For det første må åstaden bli kald. For det andre må vi vere sikre på at vi kan gå trygt inn i bygget. Veldig mange av desse brannåstadane er falleferdige bygningar, der vi må vere veldig forsiktige.

Han seier det er utfordrande å finne brannårsaka.

– Å finne sjølve brannårsaka kan vere veldig vanskeleg. Ofte er det brent heilt opp, seier han.

Risør, 3. februar:

Arendal, 27. januar:

Vågsbygd, 27. januar:

Arendal, 27. januar:

Arendal, 25. januar:

Songdalen, 18. januar: