Jesper Mathisen har fått tre gule kort på dei 27 kampane han har vore involvert i denne sesongen.
– Eg tykkjer det er litt rare reglar at ein må stå over. Det er eitt gult kort kvar niande kamp, og eg tykkjer ikkje det er så veldig stygt. Men slik er regelverket, seier Mathisen til NRK.
I tapet mot Rosenborg førre helg pådrog Mathisen seg sitt tredje gule kort for sesongen. Tre gule kort betyr at han ikkje får spele mot serieleiar Strømsgodset søndag.
– Når du spelar i forsvar blir det nokre kort i løpet av ein sesong. Eg skulle kanskje hatt fleire, så slik sett har eg kanskje sluppe billeg unna, seier han.
– Tre gule på 27 kampar er eigentleg ingenting. Det er eigentleg for lite, seier han.
Start-trenar Mons Ivar Mjelde må i tillegg klare seg utan Gudmundur Kristjansson i oppgjeret mot Godset.
– Eg håpar og trur at det ikkje skal bety allverda i ein enkeltkamp. Gummi og Jesper er tilbake mot Lillestrøm. Vi må ha fokus på dei som er klar til å spele og ta det derifrå, seier Mjelde.