Med tap i søndagens kamp mot Åsane vil Vindbjart ligge åtte poeng bak serieleiar Nest-Sotra.
– Det er ingen tvil om at det har vore tabellfokus i lang tid. Vi får meir merksemd i mediene og vi får meir folk på kampane, seier Skeie til NRK.
– Mitt mål er at vi må lære å leve med det. Vi har som mål å rykke opp til 1. divisjon ein gang. Då må vi vere budd på desse tinga, seier trenaren.
Marginar imot
Etter ein fantastisk vårsesong der laget topp tabellen, har det gått langt tyngre den siste månaden. Tre strake tap - sist mot rivalen Fløy.
Samstundes har Nest-Sotra vunne dei seks siste kampane sine og har sikra seg eit forsprang på Vindbjart i kampen om opprykk til 1. divisjon.
I juni var trenaren klar på at han ikkje ville ha snakk om opprykk innad i klubben. Han trur likevel ikkje den gode starten på sesongen har gjort spelarane stressa når ordet opprykk stadig oftare vart nemnt.
– Eg tykkjer vi har vore gode på akkurat det. Eg trur heller det er andre faktorar som skader, karantener og litt marginar. Vi hadde marginane med oss i vår. Så er det ofte slik at jo betre ein er, jo meir flaks har ein, seier han.
Trur på siger
Mot Åsane stiller Vindbjart skadefritt mannskap. Det gjer at trenaren er optimistisk med tanke på å vinne igjen, etter tre strake tap.
– Eg trur vi kan gjere ein veldig kamp. Vi har full tropp, ingen er skada, ingen er ute med karantene. Alt tilseier at vi skal prestere og folk er i god form, seier han.
– Lysta på å vinne må vere mykje større enn frykta for å tape. Lysta for å vinne er veldig sterk i laget, seier han.
– Er det kniven på strupen med tanke på opprykk i dag?
– Reint matematisk er det nok det ja, seier han.