Med siger mot Runar i Sandefjord vil ØIF Arendal sikre sitt første seriegull i eliteserien.
– Det er litt komisk. Eg var der i tre år og forsøkte å lage eit lag som kunne vinne titlar, men vi lukkast ikkje. Vi mangla det siste lille. Plutseleg skal eg stå der som motstandar og vinne ein tittel, seier Kurtovic.
Dramatisk serieinnspurt
Kurtovic var trenar i Runar i tre år før han kom til ØIF før årets sesong. I Vestfold-klubben klarte han 4. plass i serien som det beste resultatet.
Trenaren trur at mange i Runar kryssar fingrane for ØIF-gull.
– Eg kjenner mange der og er sikker på at dei fleste unnar Arendal gullet føre Bodø, seier han.
Bodø tek imot nedrykkstruga Bækkelaget på heimebane. Med Bodø-siger og ØIF-tap er det i staden Bodø som kan juble for seriegull.
– Vi må fokusere på å gjere jobben sjølv mot Runar. Mange er nok spente, men vi er klar, seier Sondre Paulsen.
- Les også: Kurtovic forlenger med ØIF
Mange supportarar tek turen
Det er venta mange ØIF-supportarar i Runarhallen onsdag. Klubben og supportarklubben Svermen har sett opp fleire bussar.
Dermed vert det truleg fleire ØIF-supportarar enn Runar-supportarar i hallen.
– Dei er ein av grunnane til at vi ligg der vi ligg. Vi må takke supportarane våre som støttar oss. Det er gledeleg om vi kan fylle hallen med raudt og kvitt. Kjem det 1500 vil eg vere superstolt. Eg er glad for alle som tek turen. Er det nokon som fortener gullet er det supportarane, like mykje som oss, seier Kurtovic.
