Tysdag vart det klart at portugisiske styresmakter avsluttar søket etter båten med tre nordmenn, ein danske og ein brite.
– Dei har vel prøvd å gjere det dei kan. Det ser mørkt ut dette, så kva kan eg seie. Dei har jo gjort det dei kunne, seier Asbjørn Abrahamsen til NRK.
Håpar og trur
Han er far til 29 år gamle Stian Abrahamsen frå Kristiansand. Seglbåten la 31. mars ut frå den tropiske øya Saint Martin i den nordaustlege Karibia.
Turen skulle gå til Azorene, om Orknøyane og til Norge.
Det har no gått 44 dagar utan at nokon har høyrt frå mannskapet.
– Ein håpar og trur at dei skal dukke opp. Men det blir mindre og mindre håp jo lengre tid det går. Men for all del, det skadar vel ikkje om dei hadde halde fram med å leite, seier han.
Vurderer å avslutte søk
– Kva trur du har skjedd?
– Eg trur dei har gått ned rett og slett, seier han.
I løpet av dagen skal Hovudredningssentralen Sør-Norge (HRS), avgjere om også dei skal avslutte søket etter dei fem sakna.
– Ein klamrar seg til eit ørlite håp og mirakel. Det verste som kan skje er å gå å ikkje vite, seier faren.