– Eg var på eit punkt i karrieren mi der eg var veldig nedbroten og hadde dårleg sjølvtillit. Eg snakka med fleire eliteserieklubbar, men ingen ville ha meg. Eg byrja å tenke at eg kanskje ikkje var god nok, seier Omoijuanfo til NRK.
Han var Lillstrøm-spelar men var ikkje i nærleiken av å spele seg inn på eliteserielaget.
Samstundes jobba Steinar Pedersen med å førebu Jerv til 1. divisjon etter opprykket frå 2. divisjon.
Ohi var eitt av namna han hadde på blokka. Dei to kjende kvarandre frå då Pedersen sjølv spelte i Lillestrøm.
– Eg stolte på Steinar
– Steinar sa i telefonen at han hadde veldig tru på meg. Så sa han: «kom hit, så lovar eg deg at du er tilbake i eliteserien i løpet av eitt år», fortel han.
– Eg stolte på han. Eg har hatt eit veldig godt forhold til han veldig lenge og var aldri i tvil om at han kunne hjelpe meg med å ta det steget eg trengde, seier 21-åringen.
– Eg hugsar godt den samtalen. Eg visste kva vi fekk i Ohi. Det er treningsmiljøet og gruppa som har hjelpt han tilbake til eliteserien, seier Steinar Pedersen.
Midtbanespelaren vart umiddelbart ein suksess i Jerv-drakta. I løpet av sesongen scora han 15 gonger og vart klubbens toppscorar.
No anbefaler den tidlegare Lillestrøm-spelaren andre spelarar i liknande situasjon å reise til Jerv.
– Steinar er ein veldig flink trenar og gruppa er fin å ha med å gjere. Eg veit det er mange spelarar i same situasjon. Dei må tore å ta steget ned eitt år og få tilbake sjølvtilliten og ta steget opp igjen slik eg har gjort, seier han.
Jaktar erstattar
Søndag var han med på å sikre kvalifiseringsplass med Jerv. Få dagar seinare skreiv han under ei treårskontrakt med eliteserieklubben Stabæk.
– Eg hadde eit par valmoglegheiter, men var ganske sikker på at det var Stabæk eg ville signere for då dei kom på bana. Det er nær Oslo og ein stor klubb som er flink med unge talent. Eg trur dei kan hjelpe meg til å bli den spelaren eg veit eg kan bli, seier Omoijuanfo.
Jerv jobbar no med å erstatte Omoijuanfo.
– Vi sonderer terrenget og skal ha eit veldig slagkraftig lag også i 2016, seier Pedersen.
Søndag spelar Jerv kvalifisering til eliteserien borte mot Hødd.